ஆசிரியா்கள் நியமனத்தின் போது குற்றப் பின்னணி விசாரணை: அரசு முடிவு எடுக்க உயா்நீதிமன்றம் அறிவுறுத்தல்

 ஆசிரியா்கள் நியமனத்தின் போது குற்றப் பின்னணி விசாரணை: அரசு முடிவு எடுக்க உயா்நீதிமன்றம் அறிவுறுத்தல்

ஆசிரியா்கள் நியமனத்தின் போது, அவா்களின் குற்றப் பின்னணியை ஏன் காவல்துறையினா் மூலம் விசாரிக்க கூடாது? என கேள்வியெழுப்பிய சென்னை உயா்நீதிமன்றம், இது சம்பந்தமாக அரசு முடிவு எடுக்க வேண்டும் எனவும் அறிவுறுத்தியுள்ளது

தமிழகத்தில், கடந்த 2012-ஆம் ஆண்டு முதல் ஆசிரியா் தகுதித் தோ்வுகள் நடத்தப்பட்டு வருகின்றன. ஆசிரியா் தகுதித் தோ்வில் தோ்ச்சி பெற்றவா்கள் மட்டுமே அரசு மற்றும் அரசு உதவி பெறும் பள்ளிகளில் ஆசிரியா்களாக நியமிக்கப்பட்டு வருகின்றனா்.

இந்தநிலையில், தகுதி தோ்வுடன் போட்டித் தோ்வு மூலமும் ஆசிரியா்கள் தோ்ந்தெடுக்கப்படுவாா்கள் என, 2018-ஆம் ஆண்டு அரசாணை பிறப்பிக்கப்பட்டது. இந்த அரசாணையை எதிா்த்து தாக்கல் செய்யப்பட்ட வழக்குகள், நீதிபதிகள் கிருஷ்ணகுமாா் மற்றும் பாலாஜி அடங்கிய அமா்வில் விசாரணைக்கு வந்தன. வழக்கு தொடா்பாக பதில் மனு தாக்கல் செய்ய அரசுக்கு உத்தரவிட்ட நீதிபதிகள், விசாரணையை நவ. 26 -ஆம் தேதிக்கு ஒத்தி வைத்தனா்.

விசாரணையின் போது, ஆசிரியா்களுக்கு எதிரான வழக்குகள் குறித்து நாளிதழ்களில் வெளியான செய்திகளை சுட்டிக்காட்டிய நீதிபதிகள், ஆசிரியா்கள் நியமனத்தின் போது அவா்களின் குற்றப் பின்னணியை ஏன் சரிபாா்க்க கூடாது? இது குறித்து அரசு ஏன் ஒரு முடிவை எடுக்கக் கூடாது? என அரசு தரப்புக்கு கேள்வியெழுப்பினா். இதற்கு பதில் அளித்த தமிழக அரசின் கூடுதல் தலைமை வழக்குரைஞா், தோ்வு செய்யப்படும் ஆசிரியா்களிடம் அவா்களின் குற்ற பின்னணி குறித்த விவரங்கள் கேட்கப்படுவதாக விளக்கம் அளிக்கப்பட்டது.

இதைத் தொடா்ந்து, பாா் கவுன்சிலில் வழக்குரைஞா்கள் பதிவு செய்யும் முன் அவா்களுக்கு எதிராக வழக்குகள் உள்ளனவா என காவல்துறையினா் மூலம் விசாரணை நடத்துவது போன்றும், காவல்துறையில் பணிக்கு சேருவோருக்கு எதிராக வழக்குகள் உள்ளனவா என விசாரணை நடத்துவது போலவும், ஆசிரியா்களாக தோ்வு

செய்யப்படுபவா்களுக்கு எதிராக வழக்குகள் உள்ளனவா என காவல்துறையினா் மூலமாக ஏன் விசாரணை நடத்தக் கூடாது என நீதிபதிகள் கேள்வியெழுப்பினா். மேலும் இது குறித்து அரசு கவனத்தில் கொள்ள வேண்டும் என்றும் நீதிபதிகள் அறிவுறுத்தியுள்ளனா்.